Elon成長記 - 18個月

對上一次係講15個月..

一彈就彈到去18個月....咁又歲半人仔啦~~

時間真係好快,,,

無打兩個月...今個月要好好記錄下了~

行為狀況:

18個月..真係大個了不少

好多野都已經識得表達... 尤其係發皮氣就最叻=.="

前排佢好鍾意打人(可能係學我打佢手手=.=)

心知不妙...要及早糾正...

但呢個歲數...同佢說教係....無乜用..但亦會照講..

 但佢地我行我素既性格...真係嘔埋血佢都未必明..

 直到有一日..我無啦啦玩野....比我好好彩糾正到佢呢個打人(或者叫拍人)既唔好動作

 係咩??

 就係有次朗爸唔小心踩到我...我勁痛..痛到嗌左出黎..

 之後自己靜靜飲泣(當然係痛到出唔到聲果隻)

點知朗朗見到我咁..佢即刻喊...

走埋黎攬住我..喊到好淒涼咁架~~

 咁我果下就叮一聲發現,,,個衰豬係驚我喊...會替我唔開心

就係咁...直到有次佢又發皮四打我..我跟手即刻七情上面..扮痛又扮喊

佢就知衰啦今次...佢又跟住一齊喊呀!!好淒涼

我叫佢say sorry...佢喊住say...再同佢講返道理!!

當然唔係一次成功...我做戲做左三四次架~~

終於發現...佢無再亂咁打人....真係感恩了~~

說話狀況:

大個囝...開始唔再係單字了~~

開始識得詞語..."食餅,,,聽歌,,,飲湯,,,食菜,,,,雞翼,,"等等等

一d指令式既更在行=.="..."開比我,,玩水呀,, 訓呢邊!!,,,媽咪呀(等同叫come on!!!)"

 但自己個名仲未好意識到叫朗朗..但望住自己張相就識叫朗朗

但問叫咩名呢...佢就答"咩名呀!!" 唉.........我暈喇~~~

 

希望佢係年尾interview前..學識叫自己個名啦~~~

我要求唔高架..唔駛識讀全名....淨係朗朗啫..唔過份丫~~唉~~

進食狀況:

由於返左健康院打歲半針..

姑娘敦促一定要改為兩奶三固..

所以朗朗而家都開始呢樣野....病愈後...進食情況理想

可以食到一碗多既飯/粥/面..

今期最愛..烏冬...同雞肉...後者多數咬完d味就吐=.=

但由佢啦~~~

小食...最愛仍然係apple....其次係bb餅餅..

而奶奶維持8-13oz一餐....早/晚比一枝奶~

希望keep住呢個胃口啦~~我就煩少好多~

身體發展:

發左幾日燒....瘦左...

而家身高仍然係90cm ...體重跌左..嗚~~去返25lbs

尿片 / 鞋仔size無變...

出牙情況 

今個月...出齊咁滯..

尚欠下面兩隻犬齒....仍然爆發中...

希望佢出晒...牙仔舒服晒..食野更加進步啦~~

與大人溝通方面: 

18個月..

自我地自己湊返...可能見既人少左

有時唔太熟既人..叫佢叫聲...都好難咁...

但都無辦法...慢慢黎...我一定要比佢知道係要叫人先乖

希望再大d會有進步啦~~

又係呢句...好似忽然大個左

好記得有一日...女人總有幾日灰既時間

無啦啦...間屋得我同個囝...我好感觸(+無聊)問朗朗

我 : 媽媽無人鍚啦~~你仲鍚唔鍚媽咪呀??? (扮喊mode)

朗: 鍚呀!!

我: 咁點鍚架??

朗用行動表示....鍚左我一啖..

我果下真係無明咁灰...但鍚左之後我流左兩滴眼淚...

好感動....所以話呢...為左呢隻囝...比埋條命佢我都願~~

 *********************************************************

嚇人後記 (嚇親唔關我事架~~hohohooo)

有晚超無聊...

係房敷返個靚mask...

但又叫朗爸抱朗入黎...

朗一入黎....好疑惑咁望住我..

之後笑左下...

咁我問"我係邊個呀???"

朗笑住答"媽咪!!"

我話"咁你鍚唔鍚我呀?"

佢欲拒還迎咁....鍚左我一啖...

wakakakakakakkaka

 

 有時都覺得自己幾變態...哈哈~~~